Bruloft van Kanna

Ze was dochter allene en verre van snel                       
maar vader was ryke, dat verandert het spel                 
ze was 50 voorby en vrijde al tien jaar                             
de mensen zeiden 20, maar dat was geen waar.

Zy peinsde op latere en hy op heur geld                          
hy zei in z’n eigen ' 't is maar dat die telt'                   
en hy klapte van trouwen en placeerde z’n woord        
het spel gerochte geklonken, ze gerochten akkoord 

 Heur vader was blyde, hij was ze toch kwyt                   
Hy was ze niet moe, maar 't was algelyk tyd                   
en hy riep de familie met nonkels en tanten                  
Hy deed ook commerce, dus ook al zyn klanten 

Ze trouwden ten elven met bloemen en tapyten               
in 't lang en in 't breed, maar dat was een suite!        
en 't duurde al niet lange, ze begosten de feeste               
met wyn en champagne en een hele koebeeste  

Z'aten lik compries en ze dronken een keuze                
Ze losten hunder rieme en gongen deur de neuze          
en je gaat ’t nu niet geloven, want 't kan haast niet zyn     
't duurde al niet lange of ze zaten zonder wyn

De vader die zag het en peinsde 'moment'                   
Hy kende de bybel en 't nieuw testament                    
Ze pompten wat water en schonken met tweeên               
en 't is lik dat je peinst, 't proefde het geen één